မျက်စိ‌ဖြင့်ညွှန်ပြမည်

သင့်ကိုငါသွန်သင်မည်၊ သင်သွားရမည့်လမ်းကိုပြတော်မူမည်၊၊ သင့်ကိုငါ့မျက်စိဖြင့်ညွှန်ပြမည်။ ဥာဏ်ပညာမဲ့သောမြင်းလားကဲ့သို့မဖြစ်နှင့်၊၊ သူသည်သင့်ထံသို့မချဉ်းကပ်သောကြောင့်ပါးစပ်ကိုဇက်ခွံ့ ၍ဇက်ကြိုးနှင့်ဆွဲရမည်၊၊(ဆာလံ ၃၂း၈-၉)

ဘုရားသခင်ကလူများကိုသွန်သင်ချင်သည်။ လမ်းပြချင်သည်။ မျက်စိဖြင့်ညွှန်ပြမည်ဟုဆိုသည်။ မျက်စိဖြင့်ညွှန်ပြခြင်းဆိုသည်မှာအဘယ်ကဲ့သို့ဖြစ်သနည်း။ ဉာဏ်ပညာမဲ့သောမြင်းလားကဲ့သို့မဖြစ်ဘို့ပြောထားသည်။ 

ဇက်ကြိုးဖြင့်ပြခြင်း

မြင်းလားများသည်ဉာဏ်ပညာမဲ့သောကြောင့်ဇက်ကြိုးဖြင့်မှောင်းနှင်ရသည်။ သူတို့ကိုမျက်စိ ဖြင့်ပြညွှန်၍မရချေ။ နှုတ်အားဖြင့်လည်းပြောပြ၍မရချေ။ ထို့ကြောင့်သူတို့၏ပါးစပ်ထဲ၌ဇက်ကြိုးကိုခွံ့ ၍ဘယ်ညာကွေ့ဘို့၊ မြန်ဖို့၊ နှေးဖို့၊ ရပ်ဖို့ကိုဇက်ကြိုးဖြင့်ဆွဲရသည်။ 

နှုတ်ဖြင့်ပြောခြင်း

 လူတိုင်းနှုတ်မှပြောသောစကားဖြင့်တယောက်နှင့်တယောက်သွန်သင်လမ်းညွှန်တတ်ကြသည်။ နှုတ်မှပြောသောစကားဖြင့်ပညာပေးခြင်း၊ ညွှန်ကြားခြင်း၊ စိတ်ထဲမှရှိသောအကြံများကိုဖေါ်ပြတတ်ကြသည်။ ခလေးများသည် နှုတ်အားဖြင့်မရသောအခါ၊ ကြိမ်လုံးဖြင့်ရိုက်ဘို့ ကျမ်းစာ၌ဖေါ်ပြထားသည်။ သို့သော်ယခုခေတ်တွင် ထိုကဲ့သို့ကြိမ်လုံးဖြင့် ရိုက်ခြင်းမပြုလုပ်ကြတော့ချေ။ နှုတ်ဖြင့်ဆုံးမသွန်သင် ၍နားမထောင်၊ အပြစ်ကျူးလွန်သူများကို အစိုးရကထောင်ချခြင်း၊ အမျိုးမျိုးပြစ်ဒဏ်ပေးခြင်းဖြင့် ဆုံးမတတ်ကြသည်။

စာဖြင့်ညွှန်ပြခြင်း

ယခုခေတ်တွင် စာပေအားဖြင့် ပညာပေး၊ သွန်သင်ပေး တတ်ကြသည်။  လူကိုယ်တိုင်နှုတ်အား ဖြင့်သာမက စာအားဖြင့် ညွှန်ပြတတ်ကြသည်။ ကုန်ထုတ်လုပ်သောအခါ၌လည်း၊ ပစ္စည်းအသုံးပြုနည်းကို စာအုပ်ဖြင့်တပါတည်းထည့်ထားတတ်သည်။ လမ်းများကိုလည်း ဆိုင်းဘုတ်များအားဖြင့် ညွှန်ပြကြသည်။ ဘုရား၏အလိုတော်ကိုလည်း ကျမ်းစာအုပ်အားဖြင့် ဖေါ်ပြထားသည်။ သို့သော်မဖတ်လျှင် ဘုရားသခင်၏သွန်သင်ခြင်းများကို နားမလည်နိုင်ချေ။ အချိန်ယူဘို့လိုသည်။ ယနေ့ယုံကြည်သူအများစု၏ အားနည်းချက်သည်၊ ကျမ်းစာမဖတ်ခြင်းဖြစ်သည်။ 

မျက်စိဖြင့်ညွှန်ပြခြင်း

ချစ်သူများအကြား၌ မျက်စိဖြင့် စကားပြောတတ်ကြသည်။ လူများအလယ်၌ မျက်စိဖြင့် အချက်ပြတတ်ကြသည်။ မျက်စိဖြင့် အချက်ပြခြင်းသည်၊ အလွန်ချစ်ကြ၍ ဂရုစိုက်သောသူများ အကြား၌ဖြစ်တတ်သည်။ ဂရုစိုက်သောသူ၊ တန်ဘိုးထားသောသူ၊ အထာသိသောသူများ အကြား၌သာ မျက်စိဖြင့်အချက်ပြနိုင်သည်။ မရင်းနှီးသောသူများ၊ တန်ဘိုးမထား၊ ဂရုမစိုက်သောသူများ အကြား၌ အသုံးမပြုနိုင်ချေ။ 

 ဘုရားသခင်က မျက်စိဖြင့်ညွှန်ပြမည်၊ ဟုဆိုရာတွင် သူနှင့်အလွန်ရင်းနှီးပြီး အထာသိဘို့ရန်လိုအပ်သည်။ သို့သော်ခရစ်ယာန်များသည် ထိုသို့မျက်စိဖြင့် အချက်ပြနိုင်လောက်အောင်၊ ဘုရားနှင့်မရင်းနှီး၊ မချစ်ခင်၊ အထာမသိကြချေ။ ထို့ကြောင့်မြင်းလားကဲ့သို့ ဒုက္ခပြသနာအားဖြင့် ညွှန်ကြားဘို့လိုသည်။ သို့သော်ဒုက္ခပြသနာအားဖြင့် ညွှန်ပြခြင်းကိုပင်နားမလည်နိုင်သောသူ များစွာရှိသည်။ ထိုသူများကို မည်သို့မျှလမ်းညွှန်၍ မရသော ကြောင့် ဝမ်းနည်းခြင်းမှတပါး မည်သို့မျှကူညီ၍မရချေ။ သင်သည်ထိုကဲ့သို့သောသူ ဖြစ်နေပါသလား။ 

ငါ၏အလေ့အလာနားမလည်ကြ

ဘုရားသခင်က၊ ဣသရေလများကို နိမိတ်လက္ခဏာ များစွာအားဖြင့်၊ ကျွေးမွေး၊ ကာကွယ်၊ ဦးဆောင် ခဲ့သော်လည်း နားမလည်၊ ဂရုမစိုက်၊ ဘုရားသခင်ကို ဆန့်ကျင်ကြသောကြောင့်၊ သူတို့၏သားမြေးများထံ ဤကဲ့သို့ဘုရားသခင်က အပြစ်တင်ခဲ့သည်၊  “ယနေ့တွင် သင်တို့သည် ဗျာဒိတ်တော်အသံကို ကြားလျက် ခိုင်မာသောစိတ်နှလုံးမရှိကြနှင့်။ သင်တို့အဘများသည် အနှစ်လေးဆယ်ပတ်လုံး ငါ့ကိုအနည်းနည်းစုံစမ်း၍၊ ငါ၏အမှုတို့ကို မြင်ရသောတောတွင်၊ ငါ့ကိုဆန့်ကျင်ဘက်ပြု၍၊ စုံစမ်းရာကာလ၌ ရှိသကဲ့သို့ မရှိစေကြနှင့်။ ထိုလူမျိုးကို ငါရွံသည်ဖြစ်၍၊ ထိုသူတို့သည် စိတ်သဘောမှားယွင်းတတ်သော လူမျိုးဖြစ်ကြ၏။ ငါ၏အလေ့အလာတို့ကို နားမလည်ကြ၊ ဟုငါဆိုရ၏။ ထို့ကြောင့်သူတို့သည် ငါ၏ချမ်းသာထဲသို့ မဝင်ရကြ၊ ဟုအမျက်ထွက်၍ငါကျိန်ဆို၏။” (ဆာ ၉၅း၈-၁၁)

အဘယ်ကြောင့် ဣသရေလလူများသည် ဘုရား၏ချမ်းသာ တည်းဟူသော၊ ခါနာန်ပြည်သို့ မဝင်ခဲ့ကြသနည်း။ ဘုရားသခင်က မဝင်နိုင်ရန် ကျိန်ဆိုခဲ့သောကြောင့်ဖြစ်သည်။ အဘယ်ကြောင့်ထိုကဲ့သို့ ကျိန်ဆိုခဲ့သနည်း။ ဘုရား၏အလေ့အလာကို နားမလည်ကြသောကြောင့်ဖြစ်သည်။ အဘယ်ကြောင့် ဘုရား၏အလေ့အလာကို နားမလည်ကြသနည်း။ စိတ်နှလုံးခိုင်မာ သောကြောင့်ဖြစ်သည်။ ထို့ကြောင့်ဆာလံဆရာက၊ သူတို့၏ဘများကဲ့သို့ စိတ်နှလုံးမခိုင်မာဘို့ သတိပေးခြင်းဖြစ်သည်။ 

ဟေဗြဲရေးသောသူကလည်း ထိုအရာကိုကိုးကား၍ စိတ်မခိုင်မာကြဘို့ ဤသို့သတိပေးရေးသားသည်၊ ထိုကြောင့်၊ သန့်ရှင်းသော ဝိညာဉ်တော် မိန့်တော်မူသည်ကား၊ ယနေ့တွင် သင်တို့သည် ဗျာဒိတ်တော်အသံ(His voice)ကို ကြားလျက်ရှိသည်ဖြစ်၍၊ ခိုင်မာသောစိတ်နှလုံး မရှိကြနှင့်။ သင်တို့အဘများသည်၊ အနှစ်လေးဆယ်ပတ်လုံး ငါ့ကို အနည်းနည်း စုံစမ်း၍၊ ငါ၏အမှုတို့ကို မြင်ရသောတောတွင်၊ ငါ့ကိုဆန့်ကျင်ဘက်ပြု၍ စုံစမ်းရာကာလ၌ ရှိသကဲ့သို့ မရှိစေကြနှင့်။ ထိုလူမျိုးကို ငါရွံသည်ဖြစ်၍၊ သူတို့သည် အစဉ် စိတ်သဘောမှားယွင်းတတ်ကြ၏။ ငါ၏အလေ့အလာတို့ကို နားမလည်ကြ၊ ဟုငါဆိုရ၏။ ထိုကြောင့်၊ သူတို့သည် ငါ၏ချမ်းသာထဲသို့ မဝင်ရကြ၊ ဟုအမျက်ထွက်၍ ငါကျိန်ဆိုသည်၊ ဟုမိန့်တော်မူချက် ရှိသည်နှင့်အညီ၊ ညီအစ်ကိုတို့၊ သင်တို့သည် အသက် ရှင် တော်မူသော ဘုရားသခင့်ထံတော်မှ၊ ထွက်သွားသောအားဖြင့် မယုံကြည်တတ်၊ ဆိုးညစ်သော စိတ်နှလုံး မရှိစေခြင်းငှါ သတိပြုကြလော့။ ဒုစရိုက်၏ လှည့်ဖြားခြင်းအားဖြင့်၊ သင်တို့စိတ်နှလုံး မခိုင်မာစေခြင်းငှါ၊ ယနေ့ဟူ၍ ခေါ်ဝေါ်သောအချိန်၊ နေ့တိုင်း အစဉ် အချင်းချင်း တယောက်ကိုတယောက် တိုက်တွန်းနှိုးဆော်ကြလော့။ (ဟေဗြဲ ၃းရ-၁၃)

ဣသရေလလူများသည် ဘုရားသခင်၏အမှုတို့ကို အနှစ်လေးဆယ်မြင်ရသည်သာမက၊ စားရ၊ သောက်ရ၊ ကျန်းမာလုံခြုံစွာ ကွယ်ကာမစခြင်း ခံစားရသော်လည်း၊ အနည်းနည်းစုံစမ်း၍ ဆန့်ကျင်ဘက်ပြုခဲ့ကြသည်။ ထိုသူများကို ဘုရားသခင်ကရွံရှာသည်။ ယနေ့ခရစ်ယာန်များ အနေဖြင့် သူတို့ကဲ့သို့ အထူးကျေးဇူးကို မခံစားရဘဲ၊ လူသားတိုင်းခံစားသောကျေးဇူးများကိုသာ ခံစားကြသည်။ သို့သော်ဣသရေလလူများ ခံစားရသောအရာများကို ကျမ်းစာ၌ဖတ်ရှု တွေ့ရှိရပြီဖြစ်သောကြောင့်၊ သူတို့ကဲ့သို့ ခံစားစရာမလိုဘဲ၊ ဘုရားကို ယုံကြည်အားကိုးနိုင်သည်။ သူတို့ကဲ့သို့ မယုံကြည်တတ်၊ ဆိုးညစ်သောစိတ်နှလုံး မရှိဘို့ဟေဗြဲဆရာက သတိပေးထားသည်။ သို့သော်ကျမ်းစာမဖတ်၊ သတိပေးသော အရာများကိုလည်း နားမထောင်၊ ဂရုမစိုက်သောကြောင့် ဣသရေလလူများကဲ့သို့ စိတ်နှလုံးခိုင်မာပြီး ဘုရားပြင်ဆင်ပေးသော ကောင်းကင်နိုင်ငံသို့ မရောက်နိုင်ဘဲ၊ ထာ၀ရမီးအိုင်ထဲသို့ ဆင်းသွားမည့်သူ များလွန်းလှသည်ကို ဝမ်းနည်းဖွယ်တွေ့မြင်နေရသည်။ ကောင်းကင်နိုင်ငံ ရောက်မည့်သူများလည်း၊ လောက၌ အသက်ရှင်စဉ် ဘုရားသခင်က တာဝန်ယူပြီး၊ ကျွေးမွေးပြုစု ကောင်းကြီးပေးမည့်အရာကို မလိုချင်ဘဲ၊ ကိုယ်ကြမ္မာ ကိုယ်ဖန်တီး ချင်ကြသောကြောင့် မလိုအပ်ဘဲ၊ ဒုက္ခပေါင်းများစွာကို ရင်ဆိုင်နေကြသည်ကို တွေ့မြင်နေရသည်။ သင်သည် ထိုသို့သောသူထဲ၌ မပါဝင်ဘဲ၊ ထာ၀ရဘုရားကို စိတ်နှလုံးအကြွင်းမဲ့ ကိုးစားသောသူ၊ သူခိုင်းသောအရာကို လုပ်သော သူ၊ သူနှင့်ရင်းနှီးကျွမ်းဝင်သောသူ ဖြစ်စေချင်သည်။ ဘုရားသခင်က သူ၏မျက်စိအားဖြင့် လမ်းညွန်ပြသခြင်း နားလည်သောသူ ဖြစ်စေချင်သည်။